Wawrinka aser Suarez nati final nung takok angu

Dubai, February 28 (Agencies) : Tan Dubai Tennis Championships asayamung tatembangba asaya Dubai nung asayadang Switzerland World No.4 Stan Wawrinka-i 6-4, 7-6 (13) agi Cyprus nunger World No.57 Marcos Baghdatis madak takok nguogo. Pai gondha ka ser minute 54 nung iba asaya koka liasü.
Asayar anaprong ya arishi küm 30 lir aser asaya tenzük dangbo tena prong kasasa asaya liasü. World No.4, Wawrinka dang nungibo Baghdatis-i ball tera timba zükpetba liasü. Ajisüaka Baghdatis pusemer timba süa “Marcos! Marcos!” ta ayimten aser Wawrinka pusemer olabo kanga mangashi.
Tanabuba set nung Wawrinka-i Baghdatis tepok nung smash ka zükloktsü. Ibaji zükloktsüli pai Baghdatis dang taitok meshi aser indangji teloki pela agizük.
Iba takok asoshi Wawrinka-i senpet sen $511,750 angu.
“Tanü asaya kanga temela masü asü aser ni iba takok anguba atema kanga pelar. Marcos-i kangsa junga asayaogo aser sentepa aliba nüburtem ajak dang kanga pelar,” ta Wawrinka-i ashi.
Ano tetsür asaya nung Spain tsür Carla Suarez Navarro-i Latvia tsür Jelena Ostapenko madak 1-6, 6-4, 6-4 agi takok angu. Iba ya zünga la asoshi WTA takok marok anabuba angur asütsü.
Lai April 2014 nung WTA mezüng marok ngua liasü.
2014 Junior Wimbledon nung Ostapenko-i takok ngua liasü. Tan tetsür tatembangba asaya nung lai Suarez Navarro den kanga meranga asaya aser anaben tashi Suarez indang service break sütsü.
Ostapenko-i mezüng set nung ace pongu tashi azük.
“Taküm küm tetenzükdang ni takok marok kabosa ngua world no 10 rongnung adentsü kü nükjidong liasü. Aser ni tan hopta iba nüjidong tongtetba atema kanga pelar,” ta Suarez Navarro-i ashi. La ya Hombarnü world no 11 nungi world no 6-i atutsü.
Iba takok ajanga ni kanga tasü itdaktsüogo. Ni final asaya aika nung tamakok ngua aruogo ajisüaka tan takok anguba ajanga ni pelar,” ta laisa ashi.