Wawrinka-i 2016 Chennai Open nung shilem agitsü

Chennai, September 22 (Agencies): Taoba mapang nung Grand Slam takok marok 2 ben tashi agizüksang, Switzerland nunger Stanislas Wawrinka-i India kübok Chennai yimti nung asayatsü ayongba 2016 Aircel Chennai Open asayamong nung shilem agitsü renema lir.
South Asia nung ayongba ATP asayamong kija, 20 buba Chennai Open asayamong ya sangküm 2016 küm January ita 4-10 nü tashi asayatsü ayonga lir.
2015 French Open aser 2014 Australian Open takok marok agizüksang, Wawrinka-i tan agi 8 ben buba atema Chennai semdangdang Chennai Open takok marok maneni agizüka hat-trick yanglutsü alizüng yua lir.
“Chennai Open asayamong nung tan agi 8 ben buba atema shilem agitsü yongyar. Ni taoba küm 2 tashi Chennai Open takok marok agizükba ajanga küm tepiyong nung takok tulu ngua shilem agiogo. Anungji, Chennai Open asayamong ya ni atema tia junga yanglutsüba asayamong ka lir,” ta Wawrinka-ia metetdaktsü.
World No. 4 Wawrinka-i tanü tashi nung Chennai Open takok marok 3 ben tashi agizükba osang jangjaogo.