Wayne Rooney, Chinese Super League-i aotsü akok

London, February 23 (Agencies): Wayne Rooney indang agent Paul Stretford-i China nung oa club balala den Rooney atema jembishinüogo.
Arishi küm 31 tain asayar ya manager Jose Mourinho kübok aiben asayatsü asoshi maongka mongui arudar, aser pa Chinese Super League nung oa asayatsü akok.
Guangzhou Evergrande, Beijing Guoan, Jiangsu Suning aser Tianjin Quanjian club temi pa alizüktsü asoshi jangraba metetdaktsü.
Osang ajanga ashiba agi, pa hopta ka nung million $1 aatsü akok, koba ajanga pa alima nung taa tajungtiba agütsüba asayar akümtsü. Ajisüaka taruba Mongolbarnü transfer window meshibang tsüngdabo iba sentong mataloktsü akok.
Mongulbarnü Europeon League Saint-Etienne nung asayadang Rooney yiruba ajanga masayatet.
Asaya metenzükdang osangbenertem den jembidang Mourinho-i Rooney tarutsüji pa kabo nung lir ta ashi.
“Nenoki pa dang asüngdangtsüla. Ni pa yangi alitsü malitsür meshitettsü. Ni taruba hopta yangi alitsü asü malitsür meshitettsü nung kodaser asayar ka sangküm club nung alitsü malitsü ni kodaser shitettsü. Aji saka Rooney-i club toktsüra aji ni pa yoknüba agi masü ta ni nenok dang shitettsü. Ni pa club nungi maneni asayadaktsüner,” ta Mourinho-i ashi.
Maneni osangbenertemi Rooney taruba hopta club toktsütsü asü? ta asüngdangba nung Mourinho langzübaji, “Nenoki pa dang asüngdangang. Ni nenok dang indang indanga shidi, ni pa meyokner.”
Rooney United den tezüngzüktepba 2018 küm tom ka tashi nung tembangtsü, koba club-i maneni küm ka atsülangtsütsü asoshi bilema lir.
Pa United nung goal timtiba agütsüsang lir, aser 2004 küm Everton nungi arua adenba nungi tenzüker tang tashi nung club den külemi Premier League 5 aser Champions League trophy 1 ta kokogo.
Taoba mapang külem asayar Carlos Tevez, Oscar aser Odion Ighalo nunger ajak China league nung oa asayadar.
Rooney-i pa taruba world cup Russia nung asayaba sülenbo international football nungi anisüngzüktsü sangdongogo.