WB assembly nung raratep, opposition lenir, Abdul mozü kidang mongdar

Kolkata, February 08 (Agencies): Tanü West Bengal assembly nung rara adoka opposition lenir, Abdul Mannan kimai atsüzüktsüdang pa shiranga mozü kidangi anir ao.
Assembly nung Congress MLA tem aser security staff tem tsüngda rara adoka liasü.
Sorkari benokba West Bengal Maintenance of Public Order (Amendment) Bill, 2017 ji ‘ozüng tanak’ lir, ta shia opposition lenir aser Congress MLA, Mannan-i ozülu amer maneni longkak aitba ajanga Speaker, Biman Banerjee-i pa anentsü.
Iba sülen security-i pa senden nungi atsüzüktsütsü merangdang security aser Congress züngsemtem tsüngda teka itepa raratep.
Iba mapang nung Mannan shiranga aita ambulance ka nung mozükidangi anir ao.
Item tatalokba anema Congress aser Left MLA temi longkak aita senden nungi ayazüka alu.
Ano külen Congress MLA, Pratima Rajak-i, security ketdangsertemi la dak tim mesüi kongshi, ta aitsüogo.
Osangbenertem den jembidang Burwan nungi MLA, Pratima Rajak-i, “Security ketdangsertemi kü ‘saree’ nung amer atsü aser kü dak metsütsü merang,” ta ashi.
Tesülen West Bengal Maintenance of Public Order (Amendment) Bill, 2017 ji senden nung agizüka liasü.
Assembly nung Chief Minister, Mamata Banerjee-i, “Kechiba parnoki (opposition) iba bill anema nokdaker? Kechiyong parnoki tesünep nung longkak aitba anemer. Parnoki nübur aser sorkar kiojen raksatsüner. Iba ya onoki memelatsü,” ta metetdaktsü.