Wb. Bendangtoshi asüba mangyimer

Dimapur, November 09 (TYO): NIDC Ltd. MD aser OSD to the Govt. Of Nagaland, Wb. Bendangtoshi Longkumer alima nungi pilaba osang angashia aoksar aser mangyimer, ta tanü Industries & Commerce and NIDC Parliamentary Secretary, Amenba Yaden-i sangdong ka nung metetdaktsü.
“Wb. Bendang ya kanga tashitait ajisüaka tongmelang nisung ka liasü aser pai pa mapatem ajak kanga nendaka inyak. Pa den külemi inyakertem atema pa ya lenir ka aser tesayur ka liasü. Pa ya sorkar atema kanga senti lenir ka liasü; pa asüba ajanga tapok tuluka apatsü. Pa tanela tesünep nung anisüngzükdakjangma,” ta paisa ashi.
“Iba ama mangyim mapang nung ni asür kibong den mangyim lemsateper. Tsüngremi nenok nem tesünep agüjang ta sarasademtsür. Asür tanela tatem makai anisüngzükdakjangma,” ta paisa lemsatep.
Ano külen tanga sangdong ka nung Lok Sabha MP, Neiphiu Rio-i, Dept. of Industries & Commerce OSD aser NIDC Managing Director, Wb. Bendangtoshi Longkumer New Delhi nung November 7, 2017 nü asüba osang angashia aoksar, ta metetdaktsü.
“Asür Bendangtoshi ya mapa tajet ketdangser ka liasü, shibai sorkar kanga nendaka tenzükogo. Pai state nüburtem atema mapa tajung jenti inyakogo aser pa den külemi inyaksemer aika melung pai koktetogo. Küm aika pa den jembishinüa arudang, pa ya ajak anisüngzükdaktsüba tetemjen nisung ka liasü ta ni ajitet,” ta paisa ashi.
“Iba ama mangyim mapang nung ozü kibongi mangyimer kibong den mangyim lemsateper. Iba ama mapang nung Tsüngremi nenok len anitsü atema onoki sarasademtsür. Asür tanela tatem makai anisüngzükdakjangma,” ta paisa lemsatep.