WB CM Mamata-i FTII kaketshirtem pusemer

Kolkata, August 21 (Agencies): Tanü West Bengal Chief Minister Mamata Banerjee-i Pune nung lungkak aiter Film and Television Institute of India (FTII) kaketshirtem pusema, iba ken o bentettsü lenmang nung yimtenren maitdaktsütsüla, ta ashi.

“FTTI nung tang adoka aliba onüktemji Centre sorkari bentettsüla. Parnoki kaketshirtem aser tesayurtem tangatetbajia benoktsüla,” ta lai twitter ajanga ashi.

“Iba lenmang nung yimtenren maittsüla, institution ji ajak dang nungi temaba,” ta laisa shisem.

FTII tongti menden asoshi TV serial ‘Mahabharata’ nung Yudhisthir shilem agisang, Gajendra Chauhan shimba anema kaketshirtemi tanü agi anogo 71 buba class nung medeni lungkak aitdagi.

Banerjee-isa, “Taoba mapangtem nunga ni kaketshirtem asoshi noktaka aruogo, kaketshirtem tangatetbaji ni akhümtsübur,” ta lai ashi.

Film Television Institute of India (FTII) kaketshirtem joko mapang talangka class nung medeni lungkak aitdaktsüba asoshi Congress-i Narendra Modi’er sorkar aija arudagi.

Tamalen Congress tatong Tir Rahul Gandhi-i, RSS-i kaket rejutem ajak agia parnok kübok yuner, ta aitsüogo.

FTII mendenbuba atema Chauhan shimba sangdongba sülen kaketshirtemi pa dak tazüngba kuli aser mangdang mali ta shia ita ana dak tali lungkak aita arudagi.