WB election nung Mamata-i Deepa Dasmunsi den tokteptsü

Kolkata, March 19 (Agencies): Taruba ita West Bengal assembly elections nung  south Kolkata, Bhawanipore Assembly constituency nung Raiganj nungi Congress Party lenir aser taoba mapang Lok Sabha züngsem, Deepa Dasmunsi-i chief minister, Mamata Banerjee den tokteptsü.
Hokolbarnü Congress bangdak lenirtemi West Bengal Chief Minister, Mamata Banerjee den toktepdaktsütsü atema Deepa Dasmunsi shimogo.
Deepa ya taoba mapang Union minister aser Congress lenir, Priya Ranjan Dasmunsi kinüngtsü lir. Tang la kinüngbu shirangdar aser 1971 küm  South Kolkata Lok Sabha nung takok ngua liasü.
Tanep Kolkata nung State Pradesh Congress Committee Tir, Adhir Chowdhury-i, party general secretary, Om Prakash Mishra-i Bhawanipore constituency nungi tokteptsü ta sangdonga liasü.
Mamata dang party nung ‘Didi’ ta ajar aser state Congress nung Deepa dang ‘Boudi’ ta ajar. Tang Deepa Dasmunsi ya south Kolkata Assembly segment kübok Rash Behari tesem nung telitak lir.
Bhawanipore Assembly constituency nung Trinamool tongti lenir, Mamata Banerjee ,  Netaji’er kinünger, Chandra Kumar Bose aser Deepa Dasmunsi nunger tsüngda sashia tokteptsü.
Bharatiya Janata Party (BJP)-i aniba NDA sorkari nüjiso atema rarar, Netaji indang kakettem sangdongtsü nangzükba sülen ita shia item kaket sangdonga arudar aser iba dak sentakba nung Banerjee den tokteptsü atema BJP-i Netaji’er kinünger, Chandra Kumar Bose shimogo.