WB, Kerala election atema nübo meyimtsütettsü akok: Kanhaiya

New Delhi, March 09 (Agencies): Jawaharlal Nehru University Students’ Union (JNUSU) Tir, Kanhaiya Kumar-i pai West Bengal aser Kerala Assembly election atema nübo meyimtsütettsüa akok, ta shiogo.

“Yimtenrenji kü nükjidong masü ta ni shiogo. Ni kaketshir ka lir aser ni PhD atemba sülen ni tesayur inyaker. Ajisüaka ni maneni yimtenren loktiliba atema inyaktsü,” ta ashi.

Arishi küm 29 Kanhaiya-i, “Kü tembar ana tang tashi jail nung lir, onoki Rohith Vemula ken o nungi Allahabad University mangatettep onüktem indang jembiogo. Kaketshirtem atema inyaktsü jenti lir, anungji nüboyimtsü atema ainlen senzütsü asoshi ni mapang kangabo malitsü,” ta ashi.

Tihar jail nungi bail nung chiokba sülen Kanhaiya-i JNU nung onük jembia liasü, iba dak sentakba nung CPM general secretary, Sitaram Yechury-i, Kanhaiya-i assembly election tem nung Left Party tem atema nübo yimtsütsü, ta sangdonga liasü.

Ajisüaka tesülen Yechury-i, Kanhaiya-i nübo yimtsütsü atema pa Kerala aser West Bengal-i maotsü saka media ajanga nüboyimtsütsü, ta jembia liasü.

Ano külen Union Minister Naidu-i, Kanhaiya jail nungi aluba sülen sangdong balala jangratema agütsür ta jembiba o meyipja Kanhaiya-i, “Naidu-i ni densema JNU kaketshirtem sandong jangratema agütsür, parnoki study ang asütsüla ta jembi. Ni pa dang ya shiner, onoki inyakba ya yimtenren tsütsü loktiliba atema inyaker, saka sorkari yimtenren nung tajangzük angutsü atema inyaker. Pai ana tetsüngdaji meteter ma (?) Pai item o mejembidang ibaji tama bendangtsüla,” ta ashi.

“JNU nung admission agitsüji kanga tasak ta linük ajungai meteta lir. Onok yangi study mesüi alir ta parnoki bilemer asü (?) Onok omenji ‘study asütsü aser merangtsü’ atema lir,” ta paisa ashi.