Wb Moatoshi-i Autumn Huddle-2 tenzüktsü

Dimapur, October 20 (TYO): Ao Students’ Union Dimapur-i (ASTD) ayongba Autumn Huddle-2 asayamung dak sentakba nung yashi marathon asemtepa sülen “As one” omen nung ajemdaker Wb Moatoshi, Retd. Additional Director, Department of Land Resources Development, Mission Director & Team Leader Nagaland Bio Resource Mission, Govt of Nagaland tongti tesemdanger süa tanü state stadium, DC Court, Dimapur nung tenzüktsüogo.

Iba asayamung ya Aor lanurtem saisapong balala nung jenjang tajungba kümdakja ajungmesotsü nükjidong nung ayongba lir.

Tongti tesemdanger, Moatoshi-i, “Pei sasa azüokbaji nüji aser ibaji ajanga nisung kati pei mulungba angateta, arendaka bilemba nungi jenbua liteter. Nükjidong ka atongtsü asoshi nüngdakba tulutibaji pei sasa azüokbaji lir koba ajanga takok bener arutsür,” ta lanurtem ayongzük.

Tanur asüdang yongi asen sasa azüoka aintsüla aser ibaji ajanga tarutsü nung takok jenti angutsü, ta pai ashi.

“Tang alima kanga kara melenshiba tensa ka nung, shibai kanga junga meshisadangi alir, parnok alima nem anisadaktsütsü,” ta Moatoshi-isa ashi.

Paisa, melenshibaji junger, ajisüaka temelenshiji kechi atema aser kodang nüngdaker ibaji angateta kanga shisa kaa lenmang teindangba shimtsüla, ta kaketshirtem dang ashi.

Iba den külemi Aor lanurtem saisapong tsütsü ajungkettsü asoshi ASTD iba ama sentong tajung ayonga akaba asoshi pai tenüngsang agütsüdang iba sentong ajanga Aor karbosa saisapong tsütsü alimai meteta nüngtugu akümtsü imlar, ta shisem.

Sentong nung Ao Students Union Dimapur, Tir, I Bendang Jamir-i tarur pela agizük aser Ao Kaketshir Mungdang (AKM) Tir, Jemti Longchar-i tayongzükba o tatsüka jembia liasü. Sentong tenzüka DABA, sannüker Rev.N Tzudir-i sarasadema.