WB nung LeT züngsem 3 nem tasüba temerenshi obendang agütsü

Kolkata, January 21 (Agencies): 2007 küm India-Bangladesh arrtsülen Petrapole nung BSF sepaitemi Pakistan nunger ana desema Lashkar-e-Taiba (LeT) telungpur asem pua liasü, aser Honibarnü West Bengal, North 24-Parganas district kübok Bongaon nung aliba court kati, par asemi sorkar anema rara ayong ta aija tasüba temerenshi obendang agütsüogo.
Pakistan nunger telungpur Mohammed Younus aser Abdullah na den India nunger, Muzaffar Ahmed Rathod nunger nem Bongaon fast track court-1 nung obendanger, Binay Kumar Pathak-i tasüba temerenshi obendang agütsü.
Par asem anema IPC Sections 120B (ozüng alema inyaktsü asameyangba temerenshi), section 121 (rara ayongba mesüra rara ayongtsü merangba) aser 122 section (India sorkar anema rara ayongtsü asoshi raraba oset bendenba), kübok ken o benok, ta CID DIG (Operations), Nishad Pervej-i osangbener dang ashi.
Abdullah aser Younus naji Pakistan nung Karachi aser Haripur na nungi lir, aser Rathod ji Jammu & Kashmir kübok Anantnag nungi lir.
2007 küm April 4 nü parnoki Petrapole nung aliba Bangladesh den International arrtsü adena India telungi aittsü merangdang BSF sepaitemi apu.
Ketdangserisa, “Parnoki Jammu & Kashmir nung army camp amaktsü sentong liasü, saka parnoki iba sentongji meinyakdakyongi BSF-i parnok puer Bangaon police station ket nung agütsü,” ta metetdaktsü.
Parnok anema bushisüngdangba ajanga, par asempronglaji AK-47 prangpong, hand grenades aser bomb yanglutsü kanga junga training agiba nisungtem liasü, ta bushitet.
Ano par asem den Maharashtra nungi LeT telungpur, Sheikh Abdullah Nayeem-a apu, ajisüaka 2013 küm pa Mumabi-i anir aodang jena otet.
Bushisüngdangba mapang Abdullah ji tesayur ka aser engineer liasü ta bushitet. Mumbai nung bomb lendong agütsüba nunga parnoki shilem agia lir ta bushitetogo.
State CID-i par asem dak polygraph aser narco tentendangba agiba den brain mapping-a agia liasü.