WB nungi angopur 42 Bangladesh Marine police-i pua lir

Canning, August 08 (Agencies): West Bengal nungi angopur tajemba agi 42 tashi Bangladesh marine police temi pua lir, ta Honibar nü ketdangsertemi metetdaktsü.
Angopur ajak ya Kakdwip, South 24 Parganas district nungi lir aser Hokolbar nü nungi Bangaladesh police ket nung lir.
“Item angopurtem ya angopuba rong balala asem nung lia tzüyim nung yipru aruba agi Bangladesh tsütsüi nunger ao aser Bangaladesh police temi apu,” ta West Bengal angopur Association nung tongti tezülur Joy Krishna Haldar-i metetdaktsü.
Pai ashiba agi, state sorkar nem iba osang agütsüogo aser parnok chiokdaktsütsü asoshi inyaktsü atema shiogo.
Tesüiba mapang nung angopur 37 tashi Bangladesh tzü tsütsüi aiba ajanga apu aser tang tashi Bangladesh police ket nung lir. “Onoki angopur ajak chiokdaktsütsü asoshi sorkar dang inyakyim tenzüktsü atema shiogo,” ta Haldar-i shisem.
State Sunderbans Development Minister Manturam Pakhira-i ashiba agi, state sorkar-i item angopurtem chiokdaktsütsü inyakyim tenzükogo.
“Centre nema iba tatalokba metetdaktsüogo aser state chief minister, Mamata Banerjee-a Bangladesh nunger den tesendaktep kanga junga lir anungji iba dak sentakba ken o tekaratiba nung tembangtsü onok tamang teimla lir,” ta Pakhira-i ashi.