Wb. Tokheho Sema alima nungi pilaogo

Dimapur, January 12 (TYO): Tanü January 12 nikongdang 12:30 ako meta Guwahati nung taoba mapang Nagaland Minister aser Padma Shree angur, Tokheho Sema alima nungi ajungbena pilaogo, aser pa asüba osang angashia lenir aikati asüko mangyim osang lemsatepogo.
Tokheho ya yimtenren nisung ka liasü aser Nagaland Interim Body nung züngsem ka ama tenzüka aru, koba ajanga 1963 küm state tenteta liasü. Pa minister-a inyakogo aser 1993 küm Congress nungi assembly elections nung toktepa liasü aser assembly nung Congress legislature party lenira inyakogo.
Nübur tenzükba mapa nung pa mapa tajung atema 2016 küm India sorkari pa nem Padma Shri agüja liasü.
Tanü pa asüba osang angashia asüko lemsatepa Nagaland Chief Minister-i asür kinüngtsü dang, “Nagaland Interim Body nung züngsem akümlir kar anünga aliba rongnungi taoba Minister aser Padma Shree angur, Tokheho Sema asüba osang angashia jashir,” ta lemsatep.
“Ni yimtenren nung ajemokdangyongi pa den atongsema inyakogo. Pa tongmelang nisung ka aser ochishir ka ta ni jangja,” ta Chief minister-isa metetdaktsü.
“Naga nunger aser ozü kibong tenüng nung ni na aser ner kibong züngsemtem den mangyimba lemsateper. Iba ama mangyimba mapang nung ajak Takoksangi nü nem tesüneptsüba aser tashi agüjang ta sarasademtsür,” ta paisa metetdaktsü.
Ano Nagaland nungi MP, Neiphiu Rio-ia, “Tanü Tokheho asüba osang angashia jashir. Nübur tenzükba mapa nung pa nem lemzüktsüba mapa ajak pai junga inyakogo. Pai nübur tajungtiba agi tenzükba ni bilemteter. Pa asübaji asen lokti atema takoksa tulu aser pa ama lenir ka melentsüji tasak asütsü,” ta ashi.
“Mangyimba kibong züngsemtem den ni asüko lemsateper aser asür tesünep nung anisüngzükang ta sarasademtsür,” ta paisa shisem.
Maneni Nagaland Legislative Assembly Speaker, Chotisuh Sazo-ia sangdong ka ajanga, Padmashree angur, taoba IBM züngsem aser taoba Minister, Tokheho Sema January12, 2017 nü ajungbena asüba osang angashia NLA-i jashia mangyimer, ta metetdaktsü. .
Speaker-isa, “Pa asübaji Naga nunger atema, talisa Sumi nunger atema takoksa tulu ka asutsü. Iba ama tejashi mangyim mapang ka nung ni aser Nagaland Legislative Assembly tenüng nung onoki mangyimba osang lemsateper. Mangyimba kibong züngsemtem nem Tsüngremi tesüneptsüba agujang ta sarasademtsür,” ta shisem.