Wb. Tongpang Ozüküm nem tenüngsang agütsü

Mongsenyimti, Rongchii 6 (TYO): 24 Angetyongpang Assembly Constituency nungi adoksang Nagaland PWD Minister, Wb. Tongpang Ozüküm nem tenüngsang agütsüba benjong ka Rogonü Mongsenyimti yimdak Ajajima moapu nung ayongzüka liogo.
Tanü iba sentong nung Minister, Tongpang Ozüküm-i jembidang, pa election nung takok angubaji pa ajungba agi masü saka nübur temeim aser Tsüngrem taochi ajanga lir, ta ashi.
Election mapang pa asemer (supporters) aser masemertem süaka, nüngdak adokdang mashi mapang nung arua ajuruteptsü asoshi kishi lapoka yutsür, ta pai metetdaktsüogo.
Nagaland Chief Minister-i pa nem maongka tulu agüja cabinet menden agütsüba asoshi paisa pelaba lemsatepa liasü.
Tanba election nung ya Angetyongpang sangertemi alima dang tatishitsü tulu ka sayuogo, iba ajanga tarutsü “Naga nunger nem teimla tasen ka agütsür”, ta paisa constituency sanger tangatetba tajung aliba asoshi tenüngsang agütsü.
Independent candidate ka ama noktakba ama adokogo, anungji, Independent amaidang kecha party nunga medeni küm punguji alitsü, ta paisa ashi.
People’s Democratic Alliance (PDA) ya temeyong pungu agi akümba sorkar mesüka lir, aji oda, nüburi aginüba aser imlaba ama sorkar takang ka agütsütsü merangtsü, anungji, iba nungji ajaki yariteptsü asoshi paisa ayongzüka liasü.
Naga lima aser Angetyongpang nung temelenshi ka tenzüktsü nükla lir, anungji, temelenshi nungji asenok ajaki shilem agitsü asoshi paisa ayongzüka liasü. Alima melenshitsübaji pa kisungi makoktsü asünung, nüburtemi maneni maparen ajak nung pa nem shisatsü agüja nungitdaktsünür, ta paisa mepishia ashi.
Election mapang maparen balala inyakdang tim masüba mapa inyaka nisung kar danga yirutsüa lira, item ajak asoshi tadok meshiba den temulung nung tamajung kecha meyui teka amteper lungjemer aotsü asoshi paisa ayongzük.
Iba sentong nung 24 Angetyongpang A/C kübok aliba unit 12 nungi meyongertem den ano par constituency nungi tantsü-tambu aser Mongsenyimti Putu yimsüsürtemi shilem agia tepela aser tayongzükba o balala jembia liasü.
Sentong nung Mongsenyimti Baptist Arogo Pastor, Imli Ozüküm-i Laishiba nung ajemdaker tenüngsang agütsüba osang tatsüka lemsatep. Iba sentong nung MLA & Adviser Imnatiba aser MLA & Adviser Dr. Longri na densema tenatia shilem agia liasü.