WBA-i India nung tan mezüngsüa aonung tsüngteptsü melar

New Delhi, February 19 (Agencies): World Boxing Association (WBA)-i melaba sülen Indian Boxing Council (IBC)-i ketdangsüa India nung tan mezüngsüa, asüng Honibar aonung professional tsüngteptsü tetoktepba agitsü renema lir.
New Delhi kübok Sri Fort Sports Complex nung agitsü ayongba tsüngteptsü tetoktepba 6-ji WBA ketdangsertemi tendangtsü renemogo.
Round 4 densemba tsüngteptsü tetoktepba nung Siddharth Varma-i super welterweight, Sukhwinder-i cruiserweight, Manoj Grewal-i heavyweight aser Sumit Rangi-i heavyweight shilem nung tsüngteptsü renema lir.
“India linüka professional boxing tetoktepdak tongti ka akümtsü tenzükogo aser iba jenjang tajung ya IBC-i bener arutsüogo,” ta WBA kübok Regional Development Advisor, Stanley Christodoulou-i metetdaktsü.
International Boxing Hall of Fame nung 2004 küm tenüng aisang, Christodoulou ya temang touzük shilem 17 prongla indang world title tetoktepba tendanger 1 buba referee aser world title 100 tashi tendanger rong nung 3 buba referee lir.
WBA-i India nung aonung professional tsüngteptsü tetoktepba ayonga agitsü melaba den külemi, professional sabang nung tsüngteptsü jangrartem asoshi tenüng züluoktsü küma 23 nungi 18 küma atsüzüktsüogo.
“Tsüngteptsü jangrartem nem mapang shitak nung professional sabang nung shilem agi tenzükdakja world title ajangzüktsü maongka agütsütsü nükjidong nung tenüng züluoktsü kümji ajemtsüogo,” ta IBC Tir, Brig (retd) P K M Raja-i osang jangjashitsü.