WC, NNPG-i wako aser temzüng indang jangjashitsür

Dimapur, October 28 (TYO): WC, NNPGs-i sangdong ka nung Naga linük wako aser temzüng indang osang jangjashitsüogo.
Naga nüjiso atema rara tenzükli nungi tongnüsen indang wako ya kanga dang temeshi süa amshia arur aser telok mesüra linük shingaia iba wako indang maitsü samatsütsü tebilemba mali. Naga yimten latetba sülen Naga nungeri tashi agütsüba Tatar Hoho aser Leacy Hoho-i iba wako koma amshitsü’ar lemtettsü. Anungji, wako atema tamajung tebilembatem agientsüla, ta WC, NNPGs-i ashi.
Ano, WC, NNPGs-i National Constitution/Yehzabo agiener ta tiyazü osang prokshir. Alemli nungi Naga nunger yimtsüngtem pei sasa ketdangsüa aru aser Naga nungeri sobaliba temzüng-ozüngtem nung ajemdaker inyaksangshia aru. British-India putu majuru tashi Naga nunger temzüng-ozüng tezüluba nung mesüra tiptema bendena maliasü. Ajisüaka, Naga sobaliba dak sendakba ken o aika nung state/regional high courts mesüra Indian Supreme Court-i customary local courts dangi telemtetba agitsü atema benogo. Tanü alimai nüngdakra, Naga nunger shisashirtem longjemer aser kin shia nung nübortem ayongdener ozüng yanglutsü aser ibaji Tatar aser Leacy Hoho tem dangi abentsü akok, ta parnokisa metetdaktsü.
Working Committee, NNPG aser India sorkar tsüngda Agreed Position nung wako mesüra temzüng takhangbatem agienogo ta jembibaji tiyazü lir, ta Media Cell sangdong nungsa shia lir.