WC, NNPGs-i Naga kin 14 den ajurutep

Dimapur, September 16 (TYO): September 15, 2019 nü Niathu Resort Chumoukedima, Dimapur nung WC, NNPGs aser Nagaland nung kin 14 ajurutepa senden ka amen.
“Iba senden ya Naga kin 14-i jatepa liasü aser parnoki iba mapa tajung inyakba pelaa agizüker. Senden nung Naga nunger maitsü aser Nagaland adena orr litsü kümzüka ayutsü atema olemtep aruba indang osang kin lennirtem dang sangoktsü” ta Media Cell, WC, NNPG-i metetdaktsü.
Ozüng alema inyakba aser azütokshitepba ajanga Naga nunger taküm aika samaogo anungji yimjung aser telongjem atema inyakang ta kin 14-i WC, NNPGs ayongzük.
Naga nungeri tang atema telemtetba ka agitsüla aser obang meputepba onüktemji angatetteptsü atema maneni olemteptsüla ta kin lennirtemisa ashi.
Naga kin 14-i shisatsü agütsüba WC NNPGs-i pela agizüker. India lennirtemi Naga yimten latettsü mulunga lir ta sayuogo aser Naga nungeria iba tangatetba nung inyaktsü mapang ka ajurua lir. Kobi melii Naga yimten latettsü ta temulung alemer, ta Media Cell-isa metetdaktsü.