WC NNPGs & India sorkar tsüngda maneni olemtep alitsü mepishir

Dimapur, Aami (June) 5 (TYO): WC, NNPGs-i tongti kin lennirtem, GBs aser tetsürtem dena tanishirtem den India sorkar o NNPGs tsüngda yimten olemtep aliba osang metetpelatsü atema Aami (June) 5, 2018 nü Hotel Saramati, Dimapur nung senden ka ayonga amen.
Senden nung WC Convener, N Kitovi Zhimomi-i 1951 Naga plebiscite indang tetezü aser tanüla taküm lir aser tang olemtep agiyonga aruba nung iba tanüla adenba ajiteter ta ashi.
Tanü Naga nunger aliba litsü ajak ka mekümtettsü asünungbo Manipur, Assam aser Arunachal Pradesh nung aliba Naga nunger nem yimten telemtetba ka agütsütsüla. Tetsü-tebou mapang nungi Naga nunger li nung Naga nunger kibur kümdaktsütsüla ta Working Committee-i senden nung ashi.
Senden nung adenertemi India sorkar aser NNPGs tsüngda ceasefire aliba nungiter aser Naga nungertemi tang yimten olemtep pusemer ta telemtetba agi.
Teloktem tsüngda ceasefire alitsü nangzüktepba nung lateta aliba ama teloktemi anidaktsüla. Ajisüaka, Indian security force temi nübortem reshikangshiba aser talisa Naga National lennirtem ki mita aoba inyakyim yagi parnoki ceasefire telatetbatem sülen manidakba aser akhümtsübu masüba sayur, ta senden nung adenertemisa lemtet.
“Naga nungertemi yimjung aginür ajisüaka telemtetba ka agiba ajanga dang yimjung angutsü. Anungji, asenoki olemtep nung tetsükdaktsü bentsür marudaktsütsüla. India sepaitemi NNPG lennir ki kar mita aobaji yimjung olemtep den meputep lir aser iba inyakyim khukua aitsür” ta senden nung adenertemisa bangzüng ka renem.
Senden nung adenertemisa India sorkar dang ceasefire telatetba kübok anidaktsü atema ayongzüktsü lemtet.
Lennirtem ki mita aoba anema Working Committee, NNPGs-i India sorkar den olemtep anena atatsü ta lemtetba meyipa agitsü aser maneni olemtep liyonga aotsü mepishitsü atema senden nung adenertemisa bangzünga renem.
Tanü senden nung adenertem- Ao Senden, Angami Public Organisation, Chakhesang Public Organisation, Chang Khullen Satchang, Central Nagaland Tribes Council, Eastern Naga People’s Organisation, Gorkha Union Dimapur, Khiamnungan Tribal Council, Konyak Union, Kuki Inpi Nagaland, Lotha Hoho, Nagaland Tribes Council, Nagaland GB Federation & all Units, Pochury Hoho, Phom People’s Council, Rengma Hoho, Sumi Hoho, United Sangtam Likhum Bumji, Yimchunger Tribal Council aser Zeliang People’s Organisation.