WC Qualifier: Japan-i Saudi Arabia akok

Saitama, November 15 (Agencies): Japan teloki Saudi Arabia telok madak takok ngua, 2018 World Cup qualifying round 3 buba asaya nung tanü, Mongolbar nü shilem agiogo.
Japan teloki goal 2-1 agi Saudi telok madak takok ngua, Japan kübok Saitama nung tentetba Saitama Stadium nung asaya liasü.
Tanü asaya tenzüker minute 45 buba nung Hiroshi Kiyotake-i penalty goal takok ngua agüja, par Japan telok temaba jenjang nung ajungkettsüba sülen külem asayar, Genki Haraguchi-i asaya tembangtsü minute 11 shi anünga alidang par telok asoshi 2 buba aser takokba goal agüja, par telok nem takok ngudaktsü.
Omar Hawsawi-ia asaya temangtsü minute 1 shi anünga alidang par Saudi telok asoshi goal 1 agütsü saka par teloki tanabuba goal memeyiptsüteti tamakok ajurua liasü.
Tan takok anguba sülen Japan teloki asaya 5 nung ajak agi points 10 ajangzüka, par Group B nung Saudi telok den sako points angur telok kümogo.
Saudi telokia tan mezüngsüa tamakok ajurur lir saka par teloki goal timba agütsüba nung ajemdaker Japan telok den temaba jenjang ngua, Group B nung densemer telok tarensen nung maneni temaba jenjang abentsü temeten ngua lir.
Group shia nungi temaba jenjang 2 ajangzüker telok anati 2018 World Cup nung asayatsü temten angutsü latetja lir.