WCYO-i Western Sumi Youth Front pusemer

Dimapur, November 27 (TYO): Western Sumi Youth Front (WSYF)-i mapang shitak nung lenmang aser aputem yanglutsü takhangba agütsübaji tim dang aser iba nung Western Chakhesang Youth Organization (WCYO)-i pusema nungiter ta metetdaktsüogo.
Lenmang aser apu tajung den power supply aser water supply timtem melii agütsütsübaji sensotemi angutsüba temeten lir. Ajisüaka, asen lima nung public utility maparen melii akümba angudang temulung raksar. Nagaland nung lenmangtem, aputem, power/electricity, water supply kanga dang temeimtsü tia ka nung lir, ta WCYO president, Likalo Letro aser Gen.Secy. Vekho Ruho nati sangdong ka nung ashi.
Asen state nung aliba infrastructure tem ya World War II mapang aser 1960s o 70s tetenzüklen yangluba lir. Asenok den kidangsüa aliba state tem nungbo international airports, flyovers, linük nung apu talangtiba, multi-lane roads & Bridges, modern stadiums amala yanglua lir saka asen state sorkaribo itemji mangur aser temulung nung shishia mebilemer.
Naga nungeri ainer kanga pelashishia agizüker aser anepalur ta jembir. Naga nunger sobaliba nung kanga takar ta tangari jembir saka domestic aser international tourist tem Dimapur tongli nungi Kohima tashi asenoki parnok reshikangshir.
WSYF-i takhangba agütsüba nung Western Chakhesang Youth Organization(WCYO)-i temulung ajaki pusema nungiter aser temeten atema raraba mapa nung tatem tashi nungittsü, ta WCYO mendenpurtemisa metetdaktsü.