WDDMA senden menogo

Dimapur, Sept. 27 (TYO) : Wokha nung yipru, tzünglu tesashi, anentsüh aser tzümetsüng agi teraksatsüba balala osang asadanga renemtsü atema September 26, 2017 nü Wokha District Disaster Management Authority (WDDMA) den line department/stakeholder tem DC Conference hall nung senden ka menogo, ta ketdangsertem sangdong ka ajanga metetdaktsü.
Senden nung jembidang Wokha DC, Wezope Kenye-i, kanga kümküma aliba ajanga district-i alima lendong balala koktettsü, ta metetdaktsü.
District ketdangsertemi ayongzüka mock drills ana kanga takok ngua kaogo, aser nübur aikati shilem agiba ajanga kanga tajangzük kaogo, ta paisa ashi.
Kenye-isa Commissioner & Secretary, Nagaland State Disaster Management Authority, Khrienuo Metha-i district atema nendaka inyakba aser rongdak mapang ajak nung district yariba atema pelaba lemsatepa liasü.
Senden nung Medical, DRDA, BSNL aser PWD (R&B) department temi Damage Assessment Report osang agütsü.
Senden nungsa Lotha Hoho Mendenbuba-ia district nung gari lenmang densema tanga lenla balala nung terenlok nüngdakba metetdaktsüba den item atemaji rongdak süa inyaktsü mepishi.