WED nü Mkg nung Inter school painting competition agi

June 5, 2019 nü MMC Complex, Mokokchung nung Mokokchung ADC aser Administrator MMCW, Manpai Phom aser Administrator Eden Academy, Temsu Jamir nati Inter school painting competition nung takok angurtem aser shilem agirtem den tangokba noksa nung angur.

Mokokchung, June 05 (TYO): Eden Academy, Mokokchung-i Swachh Bharat Mission Urban den ayongteper June 5, 2019 nü MMC Complex, Mokokchung nung Inter school painting competition den exhibition repsema agiogo, ta ketdangsertem osang ka ajanga metetdaktsü.
Taküm World Environment Day anogomong omen ‘Air Pollution’ nung ajemdaker iba tetoktepba nung shilem agitsü atema Mokokchung nung nija school ajak atema lapokja liasü.
Associate Pastor (Women), MTBA, Shilula Imchen-i painting exhibition semzüktsü aser sempet alemba sentong nung Mokokchung ADC & Administrator MMC, W. Manpai Phom densema liasü.
Iba tetoktepba nung Hill View Higher Secondary School nungi Tendimongla-i mezüngbuba jenjang nung takok angu aser tanabuba o tasembuba jenjang nung takok angurji Town Higher Secondary School nungi Jungbennaro aser Eden Academy nungi Temjensola na liasü.
Iba sentong nung ADC, W. Manpai Phom-i iba anogomong teratet metetdaktsü aser kaketshirtem dang süngdong atemtsü ajungshi.
Iba tetoktepba nung Mokokchung nung nija school 13 nungi kaketshirtemi shilem agia liasü.