– Talitemjen Imchen
Tanur asüdang, kbu den Mokokchungi aoba mapang lenmang tezü nung aliba aurong nung yongmekajisa angu. Ni kübu dang asüngdang nung, kübui masüngdangi shibai auji lepdir takang yongmeka tetkaji ak achitsüba ayu ta ashi. Tanübo iba yongmekaji mali aser amshitsüba mapang jagia mesayur. Yamaji dang doktsü nungbo yongmeka olong (meaning) ji samadoktsü. Anungji yongmeka olong ji mesamatsüsa English o nung WEEK dang ji Ao o jagi YONGMEKA ta bener arudi aser YONGMEKA telong nungji ANOGO TENETNÜ lir ta asenoki kimong ji yangludi ta bener arudanger.
Week/Yongmeka ka nung anogo tenetnü alir.
AO ENGLISH
AMONGNÜ – SUNDAY
LEPTETNÜ – MONDAY
NIKANGNÜ – TUESDAY
LODONGNÜ – WEDNESDAY
SALEPNÜ – THURSDAY
DENDINÜ – FRIDAY
YATAONTANÜ – SATURDAY
1. AMONGNÜ: – English o nung SUNDAY dang Ao o nung AMONGNÜ taji shibai meyipzüka jatetar ni mejangjar, saka Aor ajaki Sunday dang amongnü ta ajaba nungji olong kimong ji yanglua kar. Aser aji joko melenshitsü makoktsü. Iba jagi nia nenshia metentsür aser ni weekly yangludangba jia, amongnü nungji anemdaker kimong ji yangludangogo.
2. LEPTETNÜ: – Yimya agi week ka atema inyaktsü mapaji Monday nü mekazüka ayur. Saka teinyaktsü asünung nok agi lepteta ayu amai, MONDAY dangji LEPTETNÜ mesüra LEPTET ANOGO ta janer.
3. NIKANGNÜ: – Ajaki melamela angazüktsü atema leptetkaji belema/nikanga inyaktsüla ta yimdangi arutettsü mechi nikangnü olongji inokba lir. Mapa lepteter külen, wadang tulu ngua jangratema inyaker aser inyakyonga arubaji angudang mulung sangwar, saka aniadoker. Iba jagi TUESDAY dangji NIKANGNÜ mesüra NIKANG ANOGO ta janer.
4. LODONGNÜ: – Nisunger yimya agi mapa kanga meranga inyaker külenji, temang nung tashitsü balala aliba agi mapa inyaktsü lodongadoker. Aser ano iba week nung inyakmatsü asü meinyakmatsü ta wadangji nunger lodonger. Saka iba koktettsü (overcome) atema tepela ka temulungi arutsüla. Ibaji benjongbentsü aser wawamenüa ajanga süneptsür asünung tejakdangji salepnüji inokba lir. Iba jagi WEDNESDAY dang ji LODONGNÜ mesüra LODONG ANOGO ta janer.
5. SALEPNÜ: – Aorji benjong meimba dang masü saka shi sapua achiba kin ka lir. Benjong ayongnü jilia shi lepa amonger. Aser taküm ka ji belema dang inyaktsüla aser alitsü ta masü, saka shisa jagi benjongbentsü aser wawamenüa arudaktsütsü atema salepnüji inokba lir. Iba jagi THURSDAY dang ji SALEPNÜ mesüra SALEP ANOGO ta janer.
6. DENDINÜ: – Kwinü benjong atema renemyonga benjongdinüjibo kenü dang asür. Iba nüjibo ajak külemi denteta pelatepa longsoteper. Iba jagi FRIDAY dangji DENDINÜ mesüra DENDI ANOGO ta janer (temetettsü: – bodbar & honibar nung aikati benjong mayonger. Iba jagi Fridayji aru).
7. YATAONTANÜ: – Christian yimsü ya mesama tashi Sunday ya amongnüji alitsü. Aser amongnü shishitepba ya tanü tashi aikati mapet ta bilemer. Iba jagi amongnü atema lijaliyongtsü alia ayuba anogo. Saka tsürabur mapang bazaar mali asüji, arem, alu aser ayong etc. balalai aonsotsü balalatem yataonta senzüba olongji inokba lir. Iba jagi SATURDAY ji YATAONTANÜ mesüra YATAONTA ANOGO ta janer (yataonta agizükyim ji, “yata” tetezü ka dang masü balala aika, “on” tetezü aonsotsü, “ta” tetezü tzü ataba-bendener).
You must be logged in to post a comment Login