Weinstein Company shibangtsü akok

New York, October 14 (Agencies): The Weinstein Company (TWC) joko tatembang kati arur, ta osang ka ajanga ashi.
Parnoki kecha meinyakra parnok indang films aser TV sentong balala ayoktsü.
Weinstein brothers-i New York City nung tenzükba küm 12 tain, mini-major film studio ya iba company ngutetsang Harvey Weinstein, tetsür den tashiyim mapa inyakba mechi nung joko kecha mapa meinyaki akümtsü akok, ta osang ajangsa ashi.
Iba film production company indang board-i par company ya tanga company ka dang ayoktsü mesüra oda pa sasa remsepa yoka kecha mapa meinyaki akümtsü akok. Tang nungi shir parnoki nija company ka ama mapa inyaktsü tera saaka kümogo, ta Wall Street Journal nung shia lir.
Iba company alinertemi joko board züngsemtem den ajuruteptsü tenzükogo, ta kasa osang nung shia lir.
Aji oda süaka company nung co-chairman, Bob Weinstein-i iba osang ya Hokolbarnü zükdokogo.
Pai, company maneni tejaklen aotsü. 1979 küm lokteper ngutetba company ya Weinsteins temi Miramax Films toktsüba sülen Studio ya shitakbabo 2005 küm tenzük, ta ashi.
“Onok indang banks, lokteper inyakertem aser shareholders temi ozü company kanga tashi itta nungita lir aser company mesüra board-i company ayoktsü mesüra shibangtsü atema inyakteper ta osang prokshibaji tiyazü lir,” ta yashi TWC co-chairman-i sangdong ka ajanga metetdaktsü.