Wellenchila-i Miss Eastern korang angu

Dimapur, August 01 (TYO) : Eastern Nagaland Students’ Federation (ENSF) fiesta amungba mapang “Beauty with a purpose” omen nung ajemdaker July 29, 2016 nü Miss Eastern Queen tetoktepba sentonga agia liasü. Iba tetoktepba sentong nung Mon Deputy Commissioner, W. Honji Konyak tongti tesemdanger aser ENWO Tir Berila Tokiu tetushi tejaoker liasü.
Lanurtem den amungtsüji kanga jangratemtsü lir aser kü nem iba maongka agütsü ya kanga tepelatsü aser akümket mapa ka ama ni züngshir, ta tongti tesemdangeri ashi. ENSF-i sanga oa inyakba aser sentong tajung nung yakbangsa len aniba atema tenüngsang agütsür, ta pai ashi.
W. Honji Konyak-i, “Tobur ajung toktepba sentong nung shilem agiba ajanga aiürtem nema tali tangteta akümer, tajung ka atema tangar den tokteptsü renemshir aser lokti den sentaktepa akümer. Anungji tetsürtemi nükjidong tulu yur ibaji mapa küma inyaktsüla,” ta ayongzük.
Tobur ajung toktepba nung shilem agibaji takok ngur takok korang asemtsü atema dang masü, ajisüaka na ajanga tangar ajungmesoa aser alima den chitepa tajung nung ola adoktetsüsa nema tangteta akümbaji tongtibang, ta pai shilem agirtem ajungshi.
Tang iba tetoktepba nung shilem agirtem aser anünga aliba tetsürtem ajaki kanga nendaka inyakba ajanga alima otsüsütsü süa melenshia nüburtem anitsü merangtsüla, ta paisa ayongzük.
Iba tetoktepba nung Wellenchila Chang-i Miss Eastern takok korang angu, Chiuchang Lam Khiamnuingan-i  1st runner up aser Mongshai Khiamnuingan-i 2nd runner up angu.