West Africa den yaritepa kiralongrar anema raratsü mulunga lir: Erdogan

Accra, March 02 (Agencies): Turkey linüki kiralongrar anema raratsüren nung West Africa den yariteptsü melunga aliba olen ka Turkey Tir, Tayyip Erdogan-i yashi, Mongolbar nü metetdaktsüogo.

West Africa den shishilembatsü densema, shilem balala nung tesendaktep tajungba küma yanglushitsü nükjidong abener, Erdogan-i Ghana semdangdang, Ghana kübok Accra nung parliament yimsüsürtem den iba olenji lemsatepa liasü.

Africa nung tentetba linük sorkartemi Islamist telungpur aser Kurd kin nisungtemi tentetba sorkar anemer telok balala den joko küm 10 dak tema tongpang raraba osang bushiteta lir.

“Kiralongrartem anema raratsüren nung Turkey linüki tatalokba jenti ajangshia lir. Anungji, ozü Turkey-i kiralongrartem den sentakba khuret benokba linüktemi ajurushiba timtem khuret tali angatetter,” ta Islamic kiralongrartemi tawa Mali aser Burkina Faso na nung lendong kanga sashia atalokdaktsüba indang jembidang Erdogan-i lemsatepa liasü.

Islamic kiralongrartemi Burkina Faso yimtiba, Ouagadougou nung tentetba hotel aser restaurant ka taküm January ita amakba ajanga bendangertem densema, ishiba agi nisung 28 shi tepsetba osang jangjaogo.

Ano, Mali yimtiba, Bamako nunga Islamist kiralongrartemisa yaküm, 2015 küm November ita lendong kanga sashia atalokdaktsüba ajanga nisung 20 tashi asüba osang bushiteta lir.

Lendongtsüdong tesashi atalokdakdang United Nations Secrurity Council (UNSC)-i tekaratiba mapang nung nungdakba maparen inyaka lendong atalokdaktsür nokdangtdaktsütsü nükjidong nung Africa nung densemba linüktem densema, tang terenlok ngua aliba alima linük ajungai UNSC-i tekaraba nung nungdakba temelenshi agitsü asoshi nokdaktsü tajungshiba olen ka Erdogan-isa shisem.

“UNSC-i Syria, Northern Africa aser Northern Iraq nunger nung nungdakba maparen meinyaker. Ajisüaka, iba tenteti alima tashi abenba linüktembo mapang shia yarir,” ta Erdogan-i mepelaba olen ka lemsatepa liasü.

United States, Russia, China, Britain aser France linüktem UNSC nung teti asoshi züngsemtsü temeten ngua aliba linüktem lir.

Erdogan-i Ghana semdangba sülen West Africa kübok densemba Ivory Coast, Guinea aser Nigeria linüktema semdangtsü sentong renema lir.