Geneva, January 14 (Agencies): Liberia linük nung tawa Ebola tashidak poktetshiba koktetba sülen West Africa ajunga nung Ebola tashidak agi shiranger nisung ka danga meli küma Ebola tashidak West Africa ajunga nung koktetba osang ka World Health Organization (WHO)-i tanü metetdaktsüogo.
2014 küm nungi tenzükba Ebola tashidak Guinea, Sierra Leone aser Liberia nunger nung meshimeshia samatsütetba osang ka WHO-i jangjashitsüogo.
2014 küm March ita nungi tenzüka Guinea nung mezüngsüa putetba Ebola tashidaki nisung 11,300 dak tema tepsetba den külemi, nisung 28,500 dak tema timtemdaktsüba osang bushiteta lir ta par tenteti metetdaktsü.
“Ebola tashidak poktetba aser alima tashi abenba linüktemi aroki lungjemer bendanga agüja inyakba ajanga West Africa ajunga nung Ebola tashidak koktetogo,” ta WHO kübok Emergency Risk Management & Humanitarian Response (ERMHR) nung Director, Rick Brennan-i metetdaktsü.
“Ebola tashidak madak takok anguba ya meimchiri mera tulu ka agir lir. Ajisüaka, iba maparen ya anosa tatem küma meinyaki lir kechiyong tarutsü mapang nunga Ebola tashidak nungi taneptsü angur rong nung iba tashidak ya tanaben poktetshitsü ana nung dang lir,” ta pai ashi.
WHO-i ashiba agi, Ebola mesen ya iba tashidak nungi taneptsü angur kotzü nung küm 1 tashi taküm alir aser iba mesenji tangar daka menaloktsütettsü.
West Africa nung Ebola tashidak koktetba osang alima dang sangoktsüba sülen tanü tashi nung nisung kar dak iba Ebola tashidak maneni keta aliba osang 10 ben tashi bushiteta lir.
2015 küm May ita nungi tenzüka Liberia ajunga Ebola tashidak nungi kümzükba osang sangoktsüba sülen par linük nunga Ebola tashidak tasen poktetba osang 3 ben tashi bushitetogo.
“Tarutsü mapang nunga Ebola tashidak poktetshiba osang karbo angutsü akok ajisüaka, taoba mapang amabo tashidakji tulu masütsü,” ta Dr. Brennan-isa metetdaktsüogo.
You must be logged in to post a comment Login