West Bank nung Israel nunger asem kotari agi tsüngset

Jerusalem, July 22 (Agencies): West bank nung aliba Ramallah anasa Israel nunger civilian ana kotari agi tsüngset aser Halamish nunga Israel nunger ka yiru, ta Israel mitkar temi ashi. Item lendong agütsür ya kar khasetogo aser kar pua lir, ta mitkar temi ashi.
Jerusalem nung aliba temeshi tesem nung lendong balala nungi kümzüka alitsü mechi Israel mitkar temi sentong tasen kar tenzükba ajanga Palestine nüburtem aser Israel mitkartem tsüngta rongrong adoka lir.
Muslim nunger asoshi Haram al-Sharif aser Jews nunger ashi Temple Mount ta ajaba tesem nung Israel mitkartemi ‘metal detector’ inokba ajanga Israel den tesendaktep ajunga shibanga lir, ta Palestine tir, Mahmoud Abbas-i ashi.
Iba tesem nung taoba hopta Israel police ana tepsetba ajanga item inyaksangshi tasen ya tenzüktsü nüngdak lir, ta Israel-i ashir.
Hokulbarnü Halamish nung Palestine nunger Omar al-Abed-i ki ka telungi ia nisung pezü tashi kotari agi tsüngset, ta Israel mitkar temi ashir.
2015 küm tatemlen nungi Palestine mesüra Israeli Arabs temi kotari agi nüburtem dak tsünga mesüra injang khalokja lendong balala agüja arur.
Küm ana tsüngta nung iba ama lendong ajanga Israel nunger nisung 47 dak tali tepsetogo aser iba ama lendong agütsür Palestine nunger nisung 255 dak tali tepsetogo, ta osang ajanga ashir.