West Bengal dang `Bengal`, ‘Banga’ ta ajatsü

Kolkata, August 02 (Agencies): Gurgaon aser Bangalore nüngja melenshiba sülen West Bengal-a tenüng tasen melentsü.
Mongolbarnü chief minister Mamata Banerjee-i aniba sorkari West Bengal dang “West” olong indoker “Bengal” ta dang ajatsü atema benokogo.
Osangbenertem den jembidang Parliamentary Affairs Minister, Partha Chatterjee-i, “State nüburtem atema aser linük jenjang nung ozü sobaliba den senmang ajungketba den külemi kümzüktsü atema West Bengal tenüng melena English oshi agi ‘Bengal’ ta ajatsü aser Bengali oshi agi ‘Banga’ mesüra `Bangla` ajatsü benokogo,” ta ashi.
Bengali nungbo tang iba state dang ‘Paschim Banga’ mesüra ‘Paschim Bangla’ ajar.
State nüngja melentsü atema o lemteptsü asoshi temeja assembly ka ayonga akatsü, ta paisa metetdaktsü.
“August 26 nü Assembly senden tenzüktsü. Aser August 29-30 nü iba onük nung o lemtepa ajak dang tenüng tasenba agizükang ta ashitsü,” ta paisa shisem.