West Bengal doctor temi pongunübuba longkak aiter

New Delhi, June 14 (Agencies): West Bengal nung doctor temi sorkar hospital tem nung security peria agüjang, ta takhangba agüja tanü agi anogo pongunübuba longkak aitogo.
Bengal Chief Minister, Mamata Banerjee-i iba tensa atema kecha meinyakteter, ta aija Hokolbarnü sorkar hospital balala nungi senior doctor 100 dak temai sodi meshiba shidi agütsüogo.
Ano külen tanü Indian Medical Association-ia tanü nungi tenzüka anogo asemnü linük tesem ajaklen longkak ait tenzükogo aser June 17 nü ibaji tembanga doctor temi sorkar hospital ajak nung doctor tem nem security junga agüjang ta takhangba agütsütsü.
Mamata Banerjee-ibo, state nung medical tentetemi longkak aitba nung ya tangar karia shilem agia lir, ta aitsür.
Tanep Calcutta High Court-i tetuyuba ka agütsütsü memelung saka doctor tem dak teka sangshiba tatalokba dak sendakba nung state sorkari kechi inyak’ar iba osangji metetdakjang ta sorkar dang tuyuogo. Court-i sorkar nem June 21 tashi mapang agütsü.
Brihostibarnü Mamata-i ajungbena SSKM Hospital semdanga shirangertem ajuruba sülen lai doctor tem dang nikongdang 2:00 ako tashi nungbo longkak aitba anener mapa inyakang, mesüra temerenshi agütsütsü ta metetdakja liasü, saka doctor temi lai ashiba mangai maneni longkak ait.
West Bengal nung doctor ana dak teka sangshiba nung ajemdaker tanü doctor temi linük tesem ajaklen sorkar hospital nung doctor tem nem security peria agüjang ta mepishia Supreme Court nem temepishiba ka agütsüogo.
Supreme Court nem agütsüba temepishiba shidi nungji, doctor tem nem security agütsütsü atema Home affairs aser Health ministries na den külemi West Bengal sorkar nem tetuyuba agüjang, ta shia.
Doctor temisa Supreme Court dang, longkak aitba ajanga linük nung healthcare services mejungi kongshiogo aser doctor tem maliba agi nisung aika südar, ta metetdaktsü.
Tawa Kolkata nung aliba NRS medical college & hospital nung doctor ana yirutsüba sülen West Bengal nung doctor temi Mongolbar nungi tenzüka longkak aiter. Brihostibarnü doctor team kati Raj Bhavan nung state Angh, Keshari Nath Tripathi-a ajurua jembiogo.
Chief Minister Mamata-i Health & Family Welfare portfolio-a bena lir.