West Bengal, Manipur & Odisha tzümetsüng nung nisung 70 shi süogo

Kolkata/New Delhi, August 02 (Agencies) : Cyclone ‘Komen’ ajanga West Bengal, Odisha aser Manipur state tem nung tzümetsüng aser anentsüh lendong bener arutsüba ajanga nisung 70 shi taküm samaogo aser tasürtem rongnung nisung 48 tashi Bengal nungi liasü.
Deobar tashi nung West Bengal anüolentip tsütsü tzümetsüng tensa mejungi lir aser nisung lakh 2.14 shi district 12 nung lapokba relief camp 1, 537 nung jenoka lir.
“Nisung lakh 2.14 shi jenokdaktsütsü atema relief camp 1,537 lapokogo aser medical camp 204 lapokogo,” ta Disaster Management Department ketdangsertemi ashi.
Tzümetsüng ajanga ki 38,046 samatsüogo aser ano ki 2,05,901 tashi tera raksatsüogo. Ano ali tasazük hectare 4,72,645 shi ka nung tsünüsenbongtsü samatsüogo, ta ketdangsertemisa shisem.
Deobarnü state Chief Minister Mamata Banerjee-i state secretariat nung tongti ketdangsertem den ajurutepa iba khuret atema senden agiogo.
Hombarnüa Gangetic West Bengal, Sub Himalayan West Bengal aser Sikkim len tzünglu kanga arutsü, ta Indian Meteorological Department (IMD)-i kümdanga alitsü osang metetdaktsüogo.
Manipur nunga küm 200 sülen tzümetsüng tamajungtiba ajurua timtemer aser iba ajanga nisung lakh ka shi kongshiogo.
State yimtiba Imphal den Indo-Myanmar arrtsü anasa aliba Moreh aser Assam arrtsü anasa Jiribam tsüngda tesentaktep raksaogo aser ibaji ajanga rescue team tem tetsükdaktsü ajurur.
Honibarnü Chandel district kübok Koumol yimtsüng nung anentsüh tulu ka aludang nisung 20 tashi taküm sama.
Guwahati nungi National Disaster Relief teloktem tayimtsü ajanga Imphal-i yokogo aser parnok idak nungjagi Chandel district-i aotsü.
“Deobarnü Assam Rifles telok ka helicopter ajanga Joumol yim tonger search & rescue mapa inyakdar” ta sorkar ketdangser kati ashi.
Odisha nunga yim 10 tashi tzü agi metsüngbangogo aser ano yim 597 nungi nisung 479,000 jungnüa tzümetsüng ajanga timtemer.
“State nung ayong tulu ajak nung tzü talila ayimer aser ano West Bengal nungi tzü talila yimokba ajanga Balasore district kübok yim aka mobangogo” ta tanü special relief commissioner, GVV Sarma-i ashi.
Iba tzünglu ajanga linük den kidangsüa aliba Myanmar nunga timtem ajurur. Myanmar nunga tzümetsüng nung nisung 27 süogo aser nisung 150,000 shi timtemer.
Myanmar sorkari tzümetsüng agi kanga mejungi kongshiba tesem pezü “national disaster-affected regions” ta sangoktsüogo.