West Bengal nung Class 8 nung azünger ka tesayuri zükset

Kolkata, February 09 (Agencies) : West Bengal nung nija boarding school ka nung class 8 nung azünger tanur ka dak par tesayuri Hombar aonung süchia oa azükba sülen süogo. Arishi küm 14 tain kaketshir sanger kinüngertemi ashiba agi, pai tesayurtem dang temelaba magi-i school gate nung tebu den oa ajurutepba ajanga tesayuri merenshi.

Shamim Mallik ya Murshidabad district nung aliba Al Islamia Mission Boarding School nung January 22 nü nungi azünger. Iba school ya Kolkata nungi kilometre 200 pilar lir.

Nikongdang tebu-i Shamim nem pai ashiba school nung nüngdakba stationery kar alia bentsür school-i aru.

Tanubusangji takdangi meyipa oli, school kibur jakdang, tesayur jagi kanga mejungi azük ajisüaka kibur jagi pa kümzüktsü asoshi kecha meinyak, ta Shamim’er kinüngertemi ashi.

Tesayuri azükba sülen Shamim süchia ao aser parnoki ashishitsüaka shia maruba agi mozü kidangi anir ao saka pa yangji süadok, ta hostel nung alir Shamim’er medemertemi tebu dang ashiba pai metetdaktsü.

Iba tatalokba ya parnok dangbo gondha ana sülen ang ashi. “School nung ketdangsertemi ni aonung 11:00 ako nung school-i aja aser Shamim mozü kidang aliba ashi, ta tebu-i shisem.

Iba tesem nung alirtemi lungkak aita state highway mokdangba sülen police-i school kibur aser Shamim dak azüksang tesayur naprong pua lir.

You must be logged in to post a comment Login