West Bengal nung Encephalitis ajanga nisung 21 süogo

Kolkata, July 12 (Agencies): Kolkata nung aliba North Bengal Medical College (NBMC) Hospital nung tebur ka acute Encephalitis tashitak ajanga süogo, aser ibaji densemabo taküm January nungi tenzüker iba tashitak ajanga asür nisung 21 jungogo, ta tanü Health Department nung ketdangser kati ashi.
Tesüiba hopta ana tashi atorar tebur ka iba tashitak ajanga shiranga liasü aser pa yasüng NBMC Hospital nung süogo, ta ketdangseri ashi.
Iba tashitak ajanga asür parnok 21 nungi asür 14 acute Encephalitis ajanga asü aser asür tenet Japanese Encephalitis ajanga süogo, ta paisa ashi.
Iba tashitak asoshi kangabo maoksatsüla, kechiyong takümbo state sorkari iba tashitak azüoktsü asoshi mera aika agia lir, ta health ketdangserisa ashi.
“State nung iba tashitak asoshi maoksatsüla. Takümbo iba tashitak azüoktsü asoshi onoki akokba tashi agi mera ajak agiogo,” ta ketdangseri ashi.
Yaküm state nung encephalitis tapu balala ajanga nisung 200 dak tema süogo.