West Bengal nung nisung 6 ajemset

Kolkata, January 15 (Agencies): Deobarnü Kolkata nung Gangasagar Mela sentong nung nisung nungtepdang trok ajemset aser nisung 10 yirua hospital kati anir oa yaridar.
Osanga angazükba agi, Deobar nikongdang 5:00 ako meta South24 Parganas district kübok Kachuberia tesem nung iba lendongji atalok.
Gangasagar Mela ya Makar Sankranti benjung nüngtem nung ayongzüka amunger.
Honibarnü temeshi aieni aoer nisung lakh 16 Gangasagar ayong nung metenokba den külemi Kapil Muni tekülem kidang sarasadema liasü.
Iba benjung mapang lendong mataloktsü atema state sorkar aser South 24-Parganas district ketdangsertemi mera aika agiba den külemi lokti den yariteptsü atema police aser timsür 9,000 lemzükja liasü.
Iba dak alia tesem balala nung CCTVs 165 inokba den külemi Coast Guard indang rong densema rong 20 shi amshia liasü, ta ketdangsertemisa ashi.
Taküm küm atema Ganga Sagar mela omenji ‘Green and Clean’ liasü, aser nüburtem amshitsü atema ketdangsertemi metsümeshidak 10,000 yanglua liasü.