West Bengal rural election agidang rara adoka nisung 6 asü

Kolkata, Monupii/May 14 (Agencies): Tanü West Bengal nung rural bodies election agiba mapang district aika nung party balala tsüngda rara adoka nisung trok tashi süogo.
State Election Commission Secretary, Nilanjan Shandilya-i, “Tang tashi nung nisung trok asüba osang angazükogo,” ta metetdaktsü.
Nadia district nung nisung kari lanur ka tepset aser South 24 Parganas district kübok Kultali nung Trinamool Congress nung inyaker ka khaset, ta police-i ashi.
Ano Communist Party of India-Marxist nung inyaker ka North 24 Parganas district kübok Amdanga nung bomb agi pokset. Murshidabad district nunga nisung ana aser Nadia nunga nisung ka asü.
“Nadia district kübok Shantipur area nung lisopurtemi lanur asem dak azük. Police-i parnok kümzüka hospital kati anir ao, ajisüaka parnok rongnung nisung ka tenüng agi, Sanjit Pramanik bo mekümzükteti asü,” ta Nadia district Superintendent of Police, Santosh Pandey-i metetdaktsü.
“Trinamool Congress nung inyaker, Arif Ali Gazi polling station nungi adokba mapang pa dak teku nung injang khaloktsü. Pa hospital nung asü,” ta Kultali police station nung ketdangser kati metetdaktsü.
Panchayati Raj institutions nung züngsem 38,616 shimtsü atema tanep 7:00 nungi tenzüka nikongdang 5:00 ako tashi vote agutsü.
Tanep vote agutsü tenzükba sülen nungi South aser North 24 Parganas, North Dinajpur, Nadia, West Midnapore aser Cooch Behar district tem nung raratepba, polling station agiba aser ballot boxes raksatsüba osangtem aika liasü.