West Bengal sorkari tensa mazüokteter: Amit Shah

New Delhi, Aami/June 02 (Agencies): West Bengal nung BJP nung inyaker ka tepsetba tatalokba dak sendakba nung tanü BJP National Tir, Amit Shah-i West Bengal chief minister Mamata Banerjee aija, lar sorkari state nung tensa mazüokteter, ta aitsü.
Tanü Amit Shah-i twitter ajanga, “Ano Balarampur, West Bengal nung BJP nung inyaker ka, Dulal Kumar tepsetba osang angashia mepelar. West Bengal nung maneni taochi maket mapa inyakba aser raraba ya taaktsüka aser meimchir jakla den mapet. State tensa azüokba nung Mamata Banerjee’er sorkar khenyongi tamakok nguogo,” ta aitsü.
“Ni asür kibong den mangyim jashi lemsateper. Kü den BJP nung inyaker million aikati Dulal Kumar’er kibong den mangyim lemsateper. Tsüngremi iba tejashi koktettsü atema par kibong nem tashi agüjangma,” ta paisa ashi.
Tanü Purulia nung aliba tongshi ka nung arishi küm 35 tebur ka lisü agi alenseter süa liasü, aser BJP-i ashiba agi paji party nung inyaker ka liasü.
Anogo ana tejaklena kasa district kübok Balrampur nung BJP nung inyaker arishi küm 20, Trilochon Mahato (20) süngdong ka nung alenseta sür lia angu.
BJP-i, paji Trinamool Congress puri tepset ta tai tongloktsüogo , ajisüaka TMC-ibo nunga ta ashir.