West-i Syria Tir, Assad anema menokdaktsüla: Sergei Lavrov

Moscow, November 18 (Agencies): United States densemba West linüktemi Syria Tir, Bashar al-Assad anema menokdaktsü tajungshiba olen ka Russia Foreign Minister, Sergei Lavrov-i tanü Bodbar nü metetdaktsüogo.

“Tang Syria aser Iraq na nung lendong kanga sashia atalokdaktsüba den külemi, tawa France yimtiba, Paris nung nisung 129 shi tepseta lendong atalokdaktsüba kiralongrar telok tetsüti, Islamic State (IS) anema raratsüren nung alima ajunga lungjemdaktsütsü tebilemba lira, West-i Assad Syria lenisütsü menden nungi atsüngdoktsü asoshi benokba takhangba agientsüla,” ta Lavrov-i nenshia ashi.

“Tawa Austria kübok Vienna nung ayongba Syria yimjung senden nung shilem agirtemi Syria lenistsü shilem nung Assad nem maneni tongti shilem agidaktsütsü mesüra magidaktsütsü telemtetba tembanga agia mali,” ta ashiba den külemi, tawa Russia’er tayimtsü ka Egypt lushi nung tsükokdaktsüba aser Paris yimti nung lendong atalokdaktsüba sülenbo West indang tangatetba melenshiba osang bushiteta lir ta pai shisem.

“Assad Syria lenisütsü menden nungi anendaktsütsü mesüra pa nem lenisütsü menden maneni bendaktsütsü tashiji Syria nüburtem ket kija nung lir,” ta Syria pusemba Russia linüki tawa metetdakja lir.

Ajisüaka, Assad-i Syria lenisütsü menden toktsüba ajanga dang par linük nung yimji yimjung alitsü ta West tangatetba lir.

“Assad nem Syria lenisütsü menden bendaktsütsü mesüra mebendaktsütsü telemtetba tatem küma agiba sülen ang alimai IS telok den tongpang tokok ngua raratettsü,” ta Lavrov-i sangoktsü.