West Indies-i Pakistan nung T20 asayatsü memulunger

Karachi, April 18 (Agencies): Tawa World Twenty20 (T20) champions akümer, West Indies teloki Pakistan nung T20 asayatsü asoshi memulungba osang metetdaktsüogo.
South Asia nung tentetba Pakistan linük nung telungpur aser kiralongrar teloktemi  mapang shia lendong atalokdakja tensa mejungi kümdaktsüba yong West Indies-i Pakistan nung T20 asayatsüji memulungba osang jangjaogo.
Taküm September aser October ita na tsüngda nung Pakistan-i West Indies telok den T20 asaya 2, Test asaya 2 aser One-Day Internationals (ODIs) asaya 5 tashi asayatsü renema lir.
Telungpurtemi Pakistan semdanger  Sri Lanka cricket telok 2009 küm amakba sülen Pakistan nung asayatsü ayongba cricket asaya ajunga United Arab Emirates (UAE) nung ang asayaba osang bushiteta lir.
Ajisüaka, tan asayatsü renemba T20 asaya anajibo par Lahore yimti nung asayatsü asoshi Pakistan-i onük benokdanga liasü.
“Pakistan nung T20 asaya asayatsü asoshi onük benokdang saka West Indies Cricket Board (WICB)-i iba onükji magizüktsü lemtetogo. Anungji, kasaji UAE nung ang asayatsü,” ta Pakistan Cricket Board (PCB) nung mendenbuba, Shaharyar Khan-i osang jangjashitsü.