West Indies-i tebur o tetsür takok marok ngua otsü yanglur

Kolkata, April 03 (Agencies): West Indies’er tebur aser tetsür cricket telok nati pei final asaya koka 2016 ICC World Twenty20 (T20) asayamong takok marok agizüka otsü tasen tanü, Deobar nü yangluogo.
West Indies tebur teloki wicket 4 agi England telok madak takok ngua tan agi World T20 takok marok tanabenbuba agizüktsü maongka angu.
Tan takok marok agizükba sülen par telok World T20 takok marok anaben tashi agizüker telok mezüngbuba akümer lir.
England teloki mezüng batting asü aser Joe Root aser Jos Buttler nati runs 54 aser 36 yangluba densema, par teloki overs 20 nung wicket 9 laoa ajak agi runs 155 yanglu.
Tesülen, Marlon Samuels-i runs 85 yangluba den külemi, Carlos Braithwaite-i tatembangba over nung six 4 tashi yanglua kanga junga asayaba yong par teloki overs 19.4 nung wicket 6 laoa ajak agi runs 161 yanglua final asayaji kokadok.
Ano külen, Stafanie Taylor-i aniba West Indies tsürtemia wicket 8 agi Australia tsürtem madak final asaya koka tetsür World T20 takok marok agizüka liasü.
Par teloki tan mezüngsüa final nung shilem agitsü jenjang anguba den külemi, takok maroka tan mezüngsüa agizüker lir.
Taoba mapang takok marok 3 ben tashi agizüker, Australia tsürtemi mezüng batting asü aser Elyse Villani aser skipper Meg Lanning naprongi runs 52 yangluba densema, par teloki overs 20 nung wicket 5 laoa ajak agi runs 148 yanglu.
Ajisüaka, opener asayar, Taylor aser arishi küm 18 tain Hayley Matthews nati runs 59 aser 66 yangluba densema, par West Indies teloki overs 19.3 nung wicket 2 laoa ajak agi runs 149 yanglua tanü asayaji kokadok.