West Virginia: Tzümetsüng lendong nung 23 shi asü

Washington, June 25 (Agencies): US anüdoklen tentetba West Virginia state kübok densemba county 44 tashi nung emergency ozüng ka par Governor, Earl Ray Tomblin-i benokogo.
West Virginia nung küm 100 tsüngda nung tan tzümetsüng lendong tesashitiba atalokba sülen Tomblin-i par state nung emergency ozüngji benokba osang jangjaogo.
“Ozü state nung tzümetsüng lendong kanga sashia atalokba sülen tanü tashi nung nisung 23 tashi asüba osang jangjaogo. Tan tzümetsüng lendong atalokba sülen takoksa tulu bener arutsüogo. Ano, ozü rescue ketdangsertemi tan lendong nung yirurtem maneni bushia parnok kümzüktsü mapa teinyakdak lir,” ta pai osang jangjashitsü.
Tan Brehostibar nü nungi tenzüka tzünglu centimeter 25 shi aruba sülen West Virginia southwest aser tiyongtsülen densemba ayongtem nung tzü tali küma anasa aliba jila aser yimtitem tzü agi metsüngbangba osang bushitetogo.
“Lenmangtem raksaogo, aputem jirepogo, nisung aliba ki jenti raksaogo aser nüburtemi tebang agi mejembitetba timtem toushi ajurutsü tenzüka lir,” ta Greenbriar County nung Sheriff, Jan Cahill-ia metetdaktsü.
Tan tzümetsüng lendong atalokba sülen nübur meyirijang jenti light tesangwa monguteti akümba aser tzü agi metsüngba ki kilung nung nisung noklang aika timtema aliba osang bushitetogo.
West Virginia National Guard ketdangsertem 200 shi county 8 tashi nung lendong ajurua alir nüburtem kümzüktsü mapa inyakba aser lendong ajurushirtem jenokdaktsütsü atema jenokdaka 17 tashi tentetba osanga jangjaogo.