Western Sumi Hoho-i NCD dang asüngdanger

Dimapur, Aenjeti 31 (TYO): Naga Council Dimapur (NCD) indang telongtetji municipal area nung dang lir saka parnoki kechi nung ajemdaker Western Sumi Hoho dang Tsüklai 1, 2018 nü Niuland Sub-Division nung mokdangtsü tetuyuba agütsü ta WSH-i sangdong ka nung asüngdang.
WSH ya Dimapur District kübok Sumi yimtsüng 167 dak tema aliba atema tongti telok ka lir aser WSH telongtet nung Dimapur urban area tem-a dena lir. WSH ya Western Sumi tesem atema tongti telok lir aser civil body shinga kübok mali, ta WSH sangdong nung shia lir.
WSH-i iba onük süoki ia agir aser mapang tajung ka nung NCD ketdangpurtem jaoka angatetteptsü. WSH-i Sumi Council Dimapur aser züngsem ajak dang tang nungi NCD nungi tetuyuba agütsübatem magizüki atatsü metetdaktsür, ta WSH Tir Zheshito Sumi aser Tongti Tezülur Vikato Achumi nati sangdong nung metetdaktsü.