Westlife indang documentary sayatsü

Metsüremi/March 06 (Agencies): Ireland nunger nüngtugo pop band Westlife-i par telok asentenshiba indang otsü fans tem den lemsateptsü atema iba kentener teloki documentary ka sayatsü ternemba lir.
Iba documentary atema Westlife-i maparen inyakdar.
Alima ajungai sapuba band – Westlife nung Kian Egan, Shane Filan, Mark Feehily aser Nicky Byrne nunger densema lir aser taküm küm May ita European tour sentong nung par teloki shilem agiba angutsü.
Shilem pezü lemsar sayatsü aliba film atema Sky aser Netflix nati osang angazüka liasü aser tang iba project yanglutsü temeden angutsü atema Sky aser Netflix na toktepdar.
Takok tulu anguba ken – ‘Flying Without Wings’ atener telok Westlife-i parnok longjemba indang documentary yanglutsü tejangra aliba ya sapurtem aser chirnurtem dang onok telok indang otsü metetdaktsütsü atema tongtibang maparen ka asütsü ta bilemba nung documentary yanglutsü renemdar.
”Onok tanaben longjemba nung ajemdaker yanglutsü aliba documentary ya sapurtem aser ozü chirnurtem atema tongtibang asütsü,” ta Shane-i ashi.