Westminster nung kiralongrar temi tepseter nem Adele-i ken tenloktsü

Auckland, March 24 (Agencies): Westminster nung kiralongrartemi amakba mapang tepseter nem, Britan tsür nüngtugu kentener Adele-i New Zealand nung kentenba mapang akhüm agüja ken ka tenloktsü.
London nung House of Parliament anasa March 22 nü kiralongrartemi amakdang asür nem arishi küm 28 tain, Adele-i ‘Make You Feel My Love’ ken tenloktsü. Adele ya London nung soa intet.
“Ozü ki aliba tesem nung tanü kilarongrartemi amak. Aser ni alima balaka nung lir asünung asenok ola parnok nema angashidaktsünür,” ta lai telok dang sangoktsü.
Kiralongrar ka ya gari nung arua nisung aika senzüa aliba rongnung oa atsük, iba sülen pai police ka dak kotari agi atsüngtsü tenzük. Iba lendong nung tamaker aser police ketdangsür ka densema parnok pezü asü aser nisung aika kanga mejungi yiru.
“Tanü ni ozü ki kanga menungrar. Tanü ni ozü kidang kinunger aser medemertem den mapang indokner. Parnok ajunga junga lir saka parnok pezü kanga mejungi lir. Anungji ni iba ken parnok nem aser ozü ki aliba jila nung alir nüburtem nem tenloktsüner,” ta lai ashi.
Auckland nung aliba Mount Smart stadium nung lai iba ken atenba mapang terepranger nisung 45,000-i tesangwa balala amer ata.
Adele ya tang alima tesem balala nung ken tena senzüba mapang lir aser la Australia aser New Zealand nung iba sentong agiba sülen London nung aliba Wembley Stadium nung June aser July ita nung kentenba sentong pezü agitsü renema lir.