WGH nung süng shibelenba tebilemtsü tali akümer

Tura, September 3 (Agencies): West Garo Hills (WGH) nung süng lenoka shibelenba maneni kanga sashia odar aser item süngtem timba ka Williamnagar anasa arem wazüka aliba nungi atsünger. Iba dak sendakba nung Jengjal police-i Hokolbarnü Bolbokgre tesem anasa nungi süng gari nung inoka bener aotsüba lia ngutetogo. Iba tatalokba ya aonung 9:00 ako shi nung ataloka liasü.
Osang tejangja ka angazükba sülen, Jengjal police, Bolbokgre yimtsüng anasa süng lenoker bendena aliba tesemi ao. Ajisüaka ozüng alema süng shibelenertem shironki iba süngnang nüka liasü parnok amang dak jenoker ajak jena oadok.
Iba sülen item shibelenertem tanaben arua süng belener meyoktsü nükjidong nung tanüker toktsü aser tasüngnep state forest department ket nung ken o meneni bushisüngdangtsü atema bendanga agütsü.
Taoba hopta nunga iba amala ozüng alema süng shibelenba ken o ka atalokogo aser iba ajanga ochi mashiba ketdangser kar teyari ajanga arem wazüka meyuteti raksaba teyur.