WhatsApp, e-mail ajanga Hyderabad nung Muslim-tsür ana bala

Hyderabad, March 05 (Agencies): Hyderabad nung alir Muslim-tsür ana den WhatsApp aser e-mail ajanga tena kinungboi bala. Tena kinungbo ji United States nung alir.
Syeda Hina Fatima aser Mehreen Noor ya adianu ana den kibong aküm aser tena kinungbo’er kinungertemi tena ya kidang nungi meindokba ajanga tenati police nem ken o agütsü. Tena den balatsaü asoshi zülu-banglu kecha magütsü aser iba ama mapa inyakba ya Islam nunger ozüng nung mali, ta tenati ashir.
“Kü kinungboi pa indang WhatsApp noksa ‘Talaq Talaq Talaq’ ta zülua ayu aser ana tsüngda nung ajak renemogo, ta kü dangi message yok. Tanü asüng yamai dang inyaker, ta pai ashi. Kodasür WhatsApp ajanga yamai inyaktsü. Iba osang ozü kidangi aru, saka ni magizük,” ta Mehreen Noor-i osangbener dang ashi.
Mehreen Noor ya Seven Heaven Medical Agency nung inyaker, Usman Qureshi den 2015 küm kibong aküm. Heena Fatima ya Usman teti Syed Fayazuddin den kibong aküm, saka tena ita trok tejaklen kasa yimya nung bala.
“Ni mashisa lir aser pai kü den bala aser ibaji tamakoktsü, kechiyong tetsür mashisa lia balatsü makok,” ta Fatima-i ashi.
Ita trok tejaklen Fayazuddin-i US nungi Fatima tena balaba kuli kakettem yok aser Fatima-i Fayazuddin aser par kinungertem anema ken o benok. Iba ama balalulaba agientsü asoshi tetsürtemi Supreme Court nung ken o benoka lir. Islam nunger yimsü nung tebur kati tetsür ka den asemben tashi balatsü (triple talaq) mela lir.
Iba ozüng ya ajanga tetsür-tebur bendanger, ta Centre-ia Supreme Court dang ashi, saka All India Muslim Personal Law Board ajanga magizüker.
“Tetsü ka tepsetba dangbo balaba tajungba. Yimsü-i melaba anema ozüng amshiba court ajanga kicha asüngdangtsü makok,” ta parnoki ashir.