WhatsApp-i taila/tamagitsü osang putettsü atema tool sayaogo

New Delhi, Chiteni (July) 7 (Agencies): Osang tai prokshiba atema India sorkari kümdangtsü tuyuba sülen WhatsApp-i khuret koktettsü atema testing tools tenzükogo.
India nung WhatsApp nisung million 200 shi ka lir.
WhatsApp-i Suspicious Link Detection feature ka sayaogo aser iba ajanga WhatsApp amshirtemi taitsü aketba linüktem ajitettsü.
Iba feature ajanga link jagi “fake/alternative website” ka dangi belener asü masü ta asüba putettsü.
WhatsApp-i link ji tim masü ta putetra “suspicious link” ta ashitsü aser tekümdangtsü osang ka sangoktsütsü.
Tiyazü osang putetba dang masü saka WhatsApp tool tasen jagi spams & fraud links jangjadaktsütsü. Tawa tu WhatsApp-i ‘forwarded messages’ atema label ka enoksemogo.
WhatsApp-i olulu prokshiba azüoktsü atema teinyaktsü meinyaker ta India sorkari arrtsüba sülen feature tasenba sayaogo.
“Ozüng amertemi aibelenertem aputsü atema mapa inyaker saka WhatsApp ama sabang ajanga olulu maneni prokshiba ya tebilemtsü tulu ka lir” ta Ministry of electronics & information technology-i ashi.
Iba atema WhatsApp-i, “Taila osang aser olulutem azüoktsü atema onoki mapa inyakdar” ta telangzüba agütsü.
WhatsApp nung osang tai belenshiba azüoktsü atema teinyaktsütem lemsatepba researchers nem sempet agütsütsü ta company-i metetdaktsüogo.
“WhatsApp Research Awards ajanga WhatsApp, Facebook tajungba yanglushitsü atema independent research agitsü atema senotsü teyari agütsütsü. Online interaction aser information technologies azüngertem den research agirtemi tenüng agütsütsü akok” ta WhatsApp-i metetdaktsüogo.