Wheat melen sen !

Naga nungeri wheat sapua machir, anungji Delhi nungi civil supply ajanga Naga nunger asoshi yokba wheat melena sen mesüra jang dang meshi nunga koma süla (?) ta asüba tasüngdangba nung asenoki taoba hopta piyong bilemdanga aruogo. Iba ama bilemdangba jagi Delhi nungi Nagaland atema yokba wheat ya kwika arur, shitakba Nagaland atonger asü matonger ? shibai agizüker aser Shirnoki achir ? ta asüba tasüngdangbatem aika asenok mulungjangi arutsü. Item tasüngdangbatemji senso shiai metettsü tim, anungji Food & Civil Supply department nung oagi Public Information Officer dang RTI ozüng nung ajemdaker asüngdangtsüla aser metettsüla. Temetetba aser temetetter ta asüba ya school azüngba tsütsü kecha masü saka tanü asüng government kübok kechi sentongsa lir, kechi inyak nung sen angur aser nübortem asoshi government-i kechi teyarisa agütsür (?) ta asüba temetettsütem aika lir aser itemji metettsü nüngdaker. Item nüngdak metetba ajanga senso kati pei temeten tali jangjar aser mapa inyaka tajangzük angutsü lenmang angur. Tanü putu nung itemjiang temetettertem lir. Aji oda, senso kati Food & Civil Supply department-i ita nung nübortem asoshi kechisa kwi agizüker aji metettsü tim. Shitakba agibo ibaji parnok office nung zülur mataka ayutsüla aser parnok meyong website nunga sayutsü tim, anungji talisa lanurtemi Nagaland Food & Civil Suppy pur website mapang shia reprangtsüla aser mangatetba lira asüngdangtsüla. Tanü putu nung temelenshi tajung tuluka arubaji kecha miimshia inyaktsü makok ajak computer inyakyim ajanga dang inyakba ya asütsü. Aji oda, department shia website lapoktsü tim aser iba website nungji parnok mangdang, parnoki inyakba sentongtem aser mapa renemtsüba kümsük küm ajak tejangja enoka yutsütsü tim. Iba kasaji Delhi nung Center government-i state shia jangotsü yokba osang parnok ministry website nung tejangja enoka alitsü, anungji asenoki yang nung jagi osang tejangja metettsü akok. Atangji, tetenzük dang nungi shirnoksa Nagaland nung Food & Civil Supply minister, Secretary aser Director inyakogo, parnoki tajungba metettsü, ajisüaka nübortem asoshi aruba chiyongtsü ka nübortem nembo tilakata magütsüi ketdangsertem lema agiba agi nisung aika takar kümer südi. Ajisüaka, ibaji sensakertem meyong jang, wheat, totzü, metsü aser kerosene agi takar akümba asütsü. Ashiko, Nagaland nungbo iba ama angati anguba rongsenji Tsüngrem nungi anguba temoatsü amai züngshia alitsüa akok saka asenoki metettsüba kaji, Tsüngrem nungi asüyonga mapa meinyakibo temoatsü kecha mangur, kechiyong mapa inyaker külenang chiyongtsüsa Tsüngremi latetja lir. Iba jagi mapa meinyaker nembo chia techiyongdaktsü ta Laishibai ashir. Tanü Nagaland nung nübortem asoshi yokba wheat agi nisung ka takar akümdang, karbo chiyongtsüa maka aser tanur school nung admission agitsüa mali ta timtemdagi. Ano, tejashitsükaji, item takartem jagi sensakertem menüja mezüngmeshir. Tanübo, sensaker takar kecha mali ajak temetetter dang aser government inyakyim ajak sadaka dang alinungji, sensakertem kanga saksalem alitsüla. Sensakertemi pei temeten aser pei shilem bushitsüla, ola adoktsüla aser meranga inyaktsüla. India government kübok sensaker aser mekokmeinertem nem teyari agütsütsü asoshi sentong aika lateta lir, saka tia majung item sentongtem jagi nübortem matongdang ketdangsertemi senotsü chimadoker alir. Wheat agizüka chitsüba dang masü saka tanga department-tem nunga pei department kübok nübortem terenlok sentong ka inyaktsü atema yokba senotsü ajak ketdangsertemi dang chitsür aser nübortembo, temeimtsüka, takong dang toktsür. Joko, asenoka sensaker mekokmeinertem anema ochimashi mapa tamajung inyakba ya tatembang kati arudi aser temeim agi nüngdakba purtem kanga meima, ochishia aser nendaka tenzükdi. Idangjiang asen lima nung sensaker aser ajemrepa aliba purtemi nüjiso ken atenba angashitsü.