WHO Conference nung Minister, J P Nadda leniba nung yoga aitsü

Colombo/New Delhi, September 05 (Agencies): Ato kilonser, Narendra Modi-i alima sabang nung Yoga ajungkettsüba sülen maneni Union health minister, J P Nadda-ia  World Health Organisation (WHO) senden nung yoga ajungkettsütsü.
Bodhbarnü Sri Lanka nung World Health Organisation (WHO) International senden nung Minister, Nadda leniba nung yoga minute 45 aitsü.
Sri Lanka, Bangladesh, Indonesia aser Thailand densema tajemba agi linük 11 nungi Health minister tem, lenirtem aser mongintemi yoga sentong nungji shilem agitsü.
Tang mezüng UN agency senden nung yoga sentong akatsü. WHO senden nung south-east Asia tesem nung anema alibaren jenjang nung o lemteptsü aser tang teinyakdak programme tem reprangshitsü.
2014 September ita nung UN General Assembly alidang Modi-i, International Day of Yoga amungtsü atema benoka liasü. Iba sülen linük aikati pusema kümshia June 21 nü  ‘International Day of Yoga’ amungtsü atema iba kümjisa December ita nung bangzüng ka renema liasü.
Iba mapang nungjagi tenzüka Ayush ministry aser health ministry-i India aser alima sabang nung yoga ajungkettsütsü atema sentong balala ayonga inyakdar.
Sorkaria yoga tesayurtem aser rejutem ajungkettsütsü atema programmes aser schemes balala tenzüka inyakdar.