WHO-i India, southeast Asia dang maneni polio anema raratsü tuyur

Chennai, January 17 (Agencies): India nung polio koktetba sangdonger joko küm pongu jungogo, ajisüaka World Health Organization (WHO)-i India densema Southeast Asia linüktem dang maneni iba tashitak anema raratsüla, ta metetdaktsüogo.
WHO Southeast Asia region nung Regional Director, Dr Poonam Khetrapal Singh-i iba tashitak anema junga raraba atema tenüngsang agütsüba den külemi, polio tashitak ya jungjunga mesamadaktsü tashi maneni raratsüla, ta ashi.
WHO Southeast Asia region ajanga, 2011 küm West Bengal nung wild polio virus agi tatembangsüa shirangba osang lir agüja liasü, aser ibaji ajanga March 27, 2014 nü southeast Asia region-i polio-free certificate ngua liasü.
India nung polio free lir aser tang trivalent version amshia aliba nungi kobi melii ita ishika tsüngda bivalent Oral Polio Vaccine (OPV) agi melentsü sentong lir, ta sorkari tawa metetdaktsüogo.
Trivalent OPV nung wild polio type 1, 2 aser 3 atema live & weakened versions lir, ajisüaka bivalent vaccine nungbo type 1 aser type 3 na dang lir.
WHO-i India aser linük ti – Pakistan, Nigeria, Afghanistan, Cameroon, Syria, Ethiopia, Somalia aser Kenya tsüngda senzür ainertem nem vaccine agütsütsü tuyua lir.