Whoka nung tetsürtem atema sentong ayonga aka

Dimapur, Yimpoksüi/November 27 (TYO): Beti Bachao Beti Padhao scheme kübok District Administration aser National Rural Livelihood Mission (NRLM) SHGs tem senteper paper agi yangku yanglutsü asoshi training agütsüba sentong ka Yimpoksüi/Nov 27 nü VDB & VCC Conference Hall, Wokha nung kaogo.
Sentong nung shisalen agütsürji Seyiengoi Soho, Nuyi Hoshi aser Mulekho Chuzo nunger lenisüba kübok Phek Town Youth Society pur liasü aser parnoki sentong nung shilem agirtem nem tangazükba balala agüja liasü. Paper agi yanglu yanglutsü angazükba sentong nung tetsür 67-i shilem agia liasü. Iba project ya ‘Clean Green Operation Phek’ kübok ayonga aka, ta lenir-i ashi.
Sentong nung shilem agirtem den jembidang Wokha, Deputy Commissioner Dr.Manazir Jeelani Samoon, IAS-i, Beti Bachao Beti Padhao scheme ya Wokha district nung Mongputeni/Oct 2018 nung amenok aser iba sentong ya tetsürtem nem iba amala training balala agüja parnok taküm liyonga aotsü atema maongka agütsütsü asoshi lir ta ashi.
DC-isa, plastic bag amshiba toktsür paper aser au agi yangluba yangku amala local products tem ajungkettsü asoshi ajungshi. Paisa iba amal sentong ya tetsürtem peisasa metaloker litettsü asoshi maongka agütsütsü atema ayong ta ashi. Wokha district nung shishilembatsü lenmang sadema lapoka lir ta ashiba den DC-i, paper agi yagluba yangkhu amala ajungketa plastics bag amshiba anendaktsütsüla, ta ashi.
Maneni DC-isa, iba sentong takok angutsü asoshi temulung agüja adentsü atema shilem agirtem ajungshi. Dr. Manazir-isa, shisalen agütsürtem-i parnok mapang agüja district nung aliba nüburtem ajangzükdaktsütsü atema inyakba atema parnok tenüng sanga liasü.
Training nung shilem agirtem den sensaksemba mapang shisalen agütsürtemi, parnoki angazüka aliba ajak parnok dang sayutsü aser yamaji parnokia temulung agüja angazüktsü asoshi mepeshi, kechiyong iba ajanga tarutsü nung parnok ajangzüktsü. Parnokisa, plastic bag amshiba anendaktsütsü asoshi parnoki iba sentong ya 2016 küm asatet aser 2017 küm Mongputeni/Oct nung officially amenok ta metetdaktsü.
Sorkari plastic bag amshiba nokdangtsü tebilemba aliba nung parnokia teyari agütsüner ta ashi. Paper agi yangkhu yanglutsü sayuba mapang shisalen agütsür kati training nung shilem agirtem dang temulung agüja angazüktsü asoshi mepeshi, kechiyong iba ya senotsü ishika dang indoka inyakba project ka lir, saka tajangzük akaba inyakyim ka lir aser osettsüt-tem peria angur, ta ashi.
Parnokisa training nung shilem agirtem dang, district kübok commercial union tem dang tanga district nungi bener arua amshitsü melena parnoki yangluba osettem amshitsü asoshi ajungshitsü ashi. ‘Clean Green Operation Phek’ ya voluntary organization ka lir aser parnok kübok mapa inyaker 12 lir, shirnoki anogo nung paper yangkhu meyirejang 20 nungi 30 tashi yanglur, ta ketdangser sangdong ka ajanga metetdaktsü.