Wilbur Ross-i EU den ken o jembitsü : Donald Trump

Washington, Metsüremi (Agencies) : Oset kar nung sen lenzüka agitsü atema renema alibaji tajemba küma yanglushitsü aser US nunger indang oset nunga tenokdangba agüja alibatem latettsü asoshi US Commerce Secretary, Wilbur Ross-i EU representatives den ken o jemtepa jembitsü, ta tanü Tentonü US Tir, Donald Trump-i metetdaktsüogo.
Steel aser aluminum nungi sen lenzüka agitsü asoshi US nungeri renemba dak sendakba nung tawa kanga sashia atsütepa aruba mapang ka nung tang Trump-i ken o jembitsü indangji Twitter ajanga sangdongogo.
“Aluyimertem aser kechisarena yanglurtem (manufacturers) akoksatsüsa European Union-i USA anema tenokdangba agüja alibaji agiendaktsütsü asoshi Secretary of Commerce Wilbur Ross-i EU nungi teshimtet purtem denji jembitsü,” ta Trump-isa Twitter ajanga ashi.
Anogo ishika tejaklen lokti sentong ka nung jembidang, “US nungeri yangluba oset nung EU-i tenokdangba agüja alibaji majemshira German nunger gari tila (car) nunga ‘tax’ meshitsü,” ta Trump-isa amokmerena metetdaktsüogo.
Ano EU nung trade official tazüng, Cecilia Malmstroem-i ashiba agibo, “Shishilembabarenji onok amokmerentsü aser tsübudaktsütsü asoshi amshir.
“Aji oda süaka, onoki metsübur aser parnoki mezüngmeshiba anema onok nokdaktsü,” ta laisa ajang-ajanga shiogo.
Tan taoba Honibarnü Brussels yimti nung US aser EU trade officials tazüngpurtem adenshia senden amenba mapang parnok tsüngda mangatettep alibaji meyanglushitet saka maneni tan hopta songtema ken o jembia aotsü renema lir.